英國通脹越嚟越厲害，但人工就追唔上，所以大家都要節衣縮食，慳得一蚊得一蚊，難怪英國走廉價路線嘅超市越做越旺，超市Big Four(Tesco、 Sainsbury’s、Asda及Morrisons)都成為大輸家。
資料顯示，英國四大超市Tesco、 Sainsbury’s、Asda及Morrisons近半年的市場佔有率全部都跌晒，跌幅分別由2%去到5%不等，而走中產路線嘅Waitrose，跌得更加多，反而以平價招徠的德國超市Aldi及Lidl佔有率齊齊有進帳，分別勁升16.9%及9.5%。按照呢個勢頭，恐怕唔使好耐，Aldi取代Morrisons，晉身超市4強。
英國雜貨零售市場佔有率 資料來源：Statista.com
講番70年代先創辦的Lidl，成立之初經營概念炒足Aldi，依家係歐洲各地都有佢嘅足跡，我都係Lidl嘅fans🤫，早幾日先從佢哋手機app下載咗coupon，免費食咗個新鮮出爐麵包。
面對通脹升溫，大家都要慳住錢使，超市Big Four表現唔及走平價路線嘅對手，俾人搶佔唔少市場，睇嚟呢啲大超市，日後都要加把勁，提供更多啲減價優惠先可以留客。大家不妨留意下，有時間格下價，話唔定會慳多一啲。
