正當我打算分享一下喺愛丁堡租屋與買樓的分別之際，就留意到最近英國按揭市場又有新動向。多間大型銀行再次出手，掀起新一輪減息戰。
市場普遍預期英倫銀行會於下半年繼續減息，加上工黨政府亦推出新政策，協助年輕人上車，令按揭市場再次活躍起來。因此，今集除了談談我最近搵租盤與買樓的親身體驗之外，亦想同大家探討一下，在現時這個環境下，供樓與租樓的實際分別有多大。
在英國，租樓竟比買樓更困難？
不少移居英國的朋友或許都會發現，在英國租樓其實比買樓更困難。我認識幾位朋友，剛來報到時原本打算住住唔同地區，慢慢揀心水地點之後再置業；但經歷幾次尋找租盤無果後，最後在心灰意冷之下乾脆直接買樓，反而慳回唔少煩惱。
愛丁堡租屋實況：鬥快又要鬥誠意
我自己早年喺愛丁堡租屋時亦曾遇到不少波折，印象至今仍然深刻。每次搵樓，都要預咗會與幾十人競爭，先要成功預約睇樓，再提交申請，等業主逐一篩選。
為提高成功機會，我會盡量配合入伙日期，主動附上介紹信，表達誠意。由於蘇格蘭的租務法例對租客保護力度甚高，業主在揀選租客時會更加審慎，畢竟請人容易，送人難。
記得曾與一位地產代理傾談，佢表示一個租盤一推出，即時收到近百個查詢，預約睇樓的通常有七、八十人。我去睇樓時，幾乎每次都見到四、五位潛在租客喺門外排隊輪候入屋，當中不少是本地年輕人。要在如此激烈的競爭中突圍而出，確實並不容易。
買樓反而更簡單直接？
反觀今次買樓，整體過程輕鬆得多。見到合心水單位，只需填寫電郵，地產代理便會迅速回覆，安排時間睇樓，完全唔需要像搵租盤般鬥快搶頭位。
買樓講求出價策略，價高者得，若能現金交易，成功機會自然更高。整體而言，租樓比買樓難。
樓價升得快，租金追唔上？
雖然租盤在愛丁堡極之搶手，但租金升幅其實追唔上樓價。根據英國國家統計局（ONS）最新數據，愛丁堡平均樓價為 £294,000，按年上升 7.6%，高於蘇格蘭整體的 6.4%。
相比之下，租金升幅遠遠落後。平均月租為 £1,400，只上升了 3.3%。其中一房單位升幅最多，上升 4%，至 £1,005；兩房單位則升 3%，至 £1,301。
每月供樓 vs 每月租金，差距有幾大？
到底買樓還是租樓較划算？我以平均價格作一個簡單比較：
假設買入一個 £294,000 的單位，支付一成首期即約 £29,400，再以 4.5% 按揭利率、供款期為 25 年計算，每月供款大約為 £1,471。相比之下，愛丁堡平均月租為 £1,400，兩者相差僅約 £71，差距並不算大。
當然，置業還需考慮維修費用、物業稅等開支，而首期亦非人人可即時負擔。相反，雖然租樓入場困難，但靈活性高，不合適可隨時搬走。
