昨日走去Aberdeen附近一個大家可能未聽過的小鎮Stonehaven行一轉，賣點唔係有平屋租，而係風景靚，又有一間有人話係全英最好味的Fish and Chips嘅舖頭。為食嘅我，即時增加走訪這個靚海港的動力。

上星期我由Fife轉去Aberdeen途中，在火車上見到一個小鎮，即時眼前一亮，真係好靚，呢個時候，呢個地方就列入咗我嘅行程裡面😄。

出發前睇下資料，發現Stonehaven裡面有間有人話係全英最好味的Fish and Chips嘅舖頭，更加增加佢嘅吸引力。

呢間Fish and Chips外賣食店我唔開名，大家自己Google下好易搵到，免得話我賣廣告。Lonely Planet早幾年的Ultimate Eatlist的全球排名中，呢間食店排31， 亦係英國排名中最高的食店。至於最新情況及排名，我就冇再考究。

英國Fish and Chips一向出名，仲係Fishand Chips中的Fishand Chips食店，自然去行下。

英國最好味Fish and Chips有幾好味？

昨日去呢間主要做外賣的店舖，人唔多，只有六、七個人排隊，等咗10分鐘輪到我。我對薯條興趣 一般，所以就揀選咗炸洋蔥代替，連埋炸魚柳合共大概9.5磅。

以我呢個咁為食嘅人嚟講，覺得味道唔錯，首先食物是每個人落單時即叫即炸， 所以出到嚟就熱辣辣，魚柳幾新鮮，我呢啲唔太好魚嘅人都覺得唔腥，肉質鬆軟，要讚的是細細盒嘅汁。唔覺唔覺大大件的炸魚塊，唔使10分鐘食晒🤣。

呢間小店坐落海邊，我就在外邊的公眾野餐枱上開餐，望住對面的海景，感覺都幾舒服，唯一唔好嘅地方係大風💨💨，雖然有陽光，但仍有啲凍嘅感覺。

Stonhaven風景靚房價唔平

講番Stonehaven， 如果大家會去Aberdeen的話，都值得到此一遊，呢個魚港風景都好靚。

火車可以直達，但有車最好， 因為由火車站行去到海邊都要20多分鐘，再去到一啲靚少少的景點，要再行30分鐘，要有啲腳骨力。

呢個小鎮人口一萬多少少。早年前《星期日泰晤士報》選出英國50個最佳城鎮和郊區名單中，三個來自蘇格蘭，Stonehaven係其中之一，排名第46位。

不過，經過地產代理門口，望咗一下，房價都唔平😛。

*** *** *** *** ***
想了解更多關於我的蘇格蘭之旅嘅內容，可以來重溫一下過去內容。
[蘇格蘭之旅。尋找宜居之地]系列
https://edinhk.com
記得follow埋我嘅facebook專頁😊