愛丁堡獲選為2022年全球最佳旅遊城市，當然有好多好去處，不過除咗一般旅遊書的熱門推介，我又乘機抽下水，介紹一個我經常去的6個市中心熱門地點，地方又靚、又就腳，唔一定要搭車，仲係免費。
英國雜誌《Time Out》每年邀請全球2萬名居民提名最佳都市，再整合埋網絡的評價，選出全球53個最佳城市。調查結果顯示，愛丁堡獲選為今年全球最佳城市，而蘇格蘭最大城市格拉斯哥則排第4。
愛丁堡市中心6個行到去的消閒好去處
講番愛丁堡，以前住近市中心，加上當時疫情肆虐，唔可以去得太遠，所以覺得悶悶地時，都會在附近走一轉，以下介紹呢幾個近中心的地方，係我的 “飛佛”，呢啲消閒處係免費，在市中心王子大街作起點，唔使搭車都行到去，大家假日或得閒不妨去逛下。
1. Princes Street Garden 王子大街公園
離市中心： 1分鐘
愛丁堡市中心的中心就在王子街，王子街亦都是購物大道，非常熱鬧，新城方向是購物商場，另一面的舊城方向，有火車站、充滿了歷史文化色彩。
好多人忽略咗火車站隔離有個大公園，其實都好靚，特別是冬天落咗雪，我會特登去行一轉。而夏天去shopping行得攰攰地，不妨買杯咖啡坐在草地上，休閒地hea一下。
2. Royal Mile
離市中心： 11分鐘
愛丁堡舊城區的中心地帶，充滿歴史文化的建築物，附近有唔少餐廳酒吧，氣氛就好似香港的蘭桂坊， 每年七、八月或者到聖誕節期間，這一區就會特別熱鬧，有時間可以過來行一轉感受一下，行下一啲横街窄巷都唔錯。
網上有唔少資訊教大家點去行舊城及路線圖。哈利波特迷就可以搵下作者J.K. Rowling最早開始寫作的咖啡店大象咖啡館 The Elephant House。
3. National Museum 國家博物館
離市中心： 12分鐘
National Museum 位處愛丁堡舊城區，我行開有時間的話都會入去逛下，裡面是免費的，同時有各類不同的珍藏和展覧，真的可以一去再去。
4. Carlton Hill
離市中心： 11分鐘
Carlton Hill的國家紀念碑屬於愛丁堡的地標之一。位處Princes Street新城的一邊，離Apple Store 幾分鐘，這個小山丘只需上一啲樓梯，行多一陣間就可以去到山頂，沒有甚麼難度，但就可以從高處睇到愛丁堡的城市景觀，地點太就腳啦，值得一行。
行完想再去Shopping或食下野，可以去埋隔離的 St James Quarter，2021年開嘅新商場。
5. Dean Village
離市中心： 17分鐘
呢個係我 “飛佛”中的 “飛佛”，真係好靚，好似圖畫咁，如果就啱周末周日，可以check 下Stockbridge Market 有冇開，早上行完呢個farmer market，食下佢地嘅街邊小食再入去Dean Village，兩個地點相距幾分鐘。
Dean Village呢個地方可謂市中心的寧靜地帶，有溪流的田園鄉村風味，配合埋鄰近的建築物，真係好有特色，唔可以唔嚟😁。
6. Royal Botanic garden愛丁堡皇家植物園
離市中心： 27分鐘
呢個Botanic garden係免費，但好有級數，唔係一般的Botanic garden，收集超過一萬種植物😲。
去開Botanic garden不妨去埋隔離的Inverleith Park，好舒服的公園，有個湖仔，可以睇到天鵝，所以我又鐘意叫佢做 “隔離的天鵝湖”😁。
順帶一提，Inverleith Park附近有間Waitrose，呢間中產超市都幾大間，可以買埋餸返屋企。
愛丁堡作為世界旅遊城市一啲都冇浪得虛名，有好多大大小小景點值得去逛下，今次介紹住幾個市中心地方，遲下有時間會介紹一啲本地的社團活動，分享下融入社區及本地消閑的方式。
